Payment of wages through Bank

PAYMENT OF WAGES THROUGH POST OFFICES/BANKS

 

                        Central Sawrkar, Ministry of Rural Development chuan Mahatma Gandhi NREGA hnuaia hnathawktute hlawh Post Office emaw Bank kaltlanga pekchhuah hi a ngaipawimawh hle a. Central Sawrkar a Department of Rural Development leh Department of Posts te chuan hemi bawhzui nan hian Memorandum of Understanding (MOU) an signed tawh a, Mizoram ah pawh 17th November, 2008 khan Secretary, Rural Development Department leh Director of Postal Services te chuan inremna thuthlung Memorandum of Understanding (MOU) chu an signed ve ta ani.

                        Post Office kaltlanga hlawh semchhuah hi Khawbung RD Block ah pawh October, 2009 atang khan bul tan a ni ta a, Sub Post Master, Branch Post Master leh VC te inpekna zarah he scheme hi tluang takin kalpui zel a ni, a lawmawm hle. Tunah hian Khawbung RD Block hnuaia khua 25 awm ah khaw 21 te hian Post Office kaltlangin Mahatma Gandhi NREGA hlawh an la mek a, khaw 2 in MRB, Bungzung kaltlangin hlawh an la thung a, Post Office emaw Bank emaw kaltlang lo a hlawh la chu khaw 2 chiah an ni ta, hei hi hmasawnna pawimawh tak a tling a ni.

                        Post Office kaltlanga hlawh sem ah hian Mahatma Gandhi NREGA Job Card nei te’n anmahni khua emaw an khaw hnaih ber Post Office ah emaw Vohbik Account hawn theuh tur a ni a, Branch Post Office lamin Savings Bank Account SB-3 hmangin Vohbik Account  lo hawnsak vek tur a ni. Vohbik Account Number erawh dan dinglai angin Sub Post Master (SPM) in a lo pek (allot) tur a ni thung a ni. He Vohbik Account ah hian Job Card holder in hming a sign hnan thlap a ngai a ni.

                        Mahatma Gandhi NREGA hlawh te Post Office kaltlanga semna tur hian Department of Posts lam pawhin an dan dinglai te tidanglam in Savings Account thar “Workers Wage Account” an siam thar a, hei hi Vohbik Account tiin kan lo sawi thin a ni. He Vohbik Account hawn leh hman dan turah a hnuaia kaihhruaina hrang hrang hi siam a ni:

  1. Vohbik Account hawn nan hian pawisa pek a ngai lo
  2. Vohbik Account ah hian minimum balance dah a ngai kher lo
  3. Mahatma Gandhi NREGA hlawh bak he Vohbik Account ah hian dah a thiang lo
  4. He Vohbik Account hi transfer a thiang lo a, hawn tawh hnuah joint account tur emaw a leh (convert) phal a ni lo
  5. Mahatma Gandhi NREGA Job Card holder Vohbik Account nei tawh an pem anih pawhin an Vohbik Account chu an pempui thei lo ang, an pem dawnah an pawisa neih ang ang te lakchhuah zawk mai tur ani
  6. Cheque system hman phal a ni lo
  7. He scheme hnuaiah hian Account Number a hranpa hlak pek tur a ni a, Savings Account dang nen number pek pawlh loh tur ani.
  8. He scheme hnuaiah hian Mahatma Gandhi NREGA hnuaia in registered te tan mimal Account a hranga hawn phal a ni a, Job Card pakhat a hming hrang hrang te chuan Job Card number pakhat hmang theuhin Vohbik Account an hawng thei  ani.
  9. Joint Account pawh Job Card pakhat a in registered ve ve (eg. Nupa) te’n an hawng thei bawk. (Office record a felfai zawk nan leh hlawh sem dawna SPM/BPM te tan a samkhai zawk nan Job Card tin ah Job Card holder hmingin emaw chhungkaw pa ber hmingin emaw Vohbik Account hi hawn ni thei se)
  10. He scheme hnuaiah hian miin a duh chuan rokhawmtu (nominee) dan pangngai angin a siam thei bawk ang
  11. Dan pangngai angin interest awm thei ang ang te Account ah dah sak tur a ni.
  12. Vohbik Account te hi khawih chet miah loh a a lo awm pawhin silent account (account thi) anga ngaih tur a ni lo. Job Card holder tuemaw Job Card list atanga paih a lo nih chuan SPM/BPM te’n Job Card holder hnenah Account titawp (close) vat tura hriattir tur ani a, ni 30 chhunga a Account a titawp lo anih chuan SPM/BPM chuan withdrawal form fill-up in pawisa awm zawng zawng leh interest te a lakchhuah sak ang a, Money Order hmangin a neitu hnenah a thawn ang.
  13. Miin Vohbik Account atanga pawisa a lakchhuah duh chuan Withdrawal Form (SB-7) ah a pawisa lakchhuah duh zat a tarlang ang a, Vohbik Account Pass Book a keng tel ngei ngei tur a ni a, Mahatma Gandhi NREGA danin a phut angin “Wage Slip” VC in an signed hnan ngei te nen a thehlut tur ani.
  14. Withdrawal hi a theih chin chin ah Job Card holder in a ti tur a ni, engemaw harsatna a awm anih chuan aiawh (representative) hmangin lak phalna (authorization letter) ziak thlapin tihtur a ni.

 

                        Mahatma Gandhi NREGA hnuaia Work Order pakhat a hna thawh zawh anih hnuah VC te’n dan pangngaiin BDO/PO Office ah Muster Roll thehluh tur a ni a, hemi rual hian hna thawh zawh ani tih tarlanna Vigilance & Monitoring Committee (VMC) Chairman leh bialtu VLAA in an signed ngei Completion Certificate leh VCP signed ngei Utilisation Certificate te thehluh tel ngei ngei bawk tur ani. BDO/PO Office lamah Muster Roll leh Completion Certificate te check vek anih hnuah VC te hnenah Pay Order leh Wage Slip pekchhuah a ni chauh ang.

                        Pay Order kan tih hi “hlawh sem theihna Order” ani tiin a tawi zawngin  a sawi theih mai awm e. He Pay Order ah hian khaw hrang hranga hnathawktu hming (Job Card neitu hming), Job Card number, Vohbik Account number, hnathawh ni zat (number of days), hlawhzat turte leh hnathawh hming te chiang taka tarlan a ni a, he Pay Order hmang hian Post Office leh Bank te’n hlawh an lo sem thei dawn a ni. Pay Order hi Post Office leh Bank lam tan chuan document pawimawh tak a tling a, he Pay Order hmuh hma chuan hlawh sem mai theih ani lo.

                        Wage Slip hi BDO/PO Office atangin Muster Roll thehluh ruala VC te hnena pekchhuah thin tur ani. He Wage Slip hi VC te’n Job Card neitu/hnathawktu zawng zawngte hnenah an thawh zawh veleh an pe chhuak thin ang a, he Wage Slip ah hian VCP emaw VC Secretary in emaw a sign hnan ngei tur ani. He Wage Slip ah hian hnathawktu Job Card number te, hlawhlak tur zat te, hnathawh ni te leh hlawh lakna tur Post Office/Bank te chiang taka tarlan tur ani. Miin tumkhatah a pawisa lachhuak vek loin a hnuah la leh duh ta se, Wage Slip dang a ken leh kher a ngai tawh chuang lo ani. He Wage Slip tel lo hi chuan miin a inhlawhna pawisa a lakchhuah a rem lo a, he Wage Slip tel lo hian BPM tan hlawh sem theih a ni lo.

                        Mahatma Gandhi NREGA hnuaia hlawh te hi District Programme Coordinator (DPC) atangin BDO/PO ah cheque a dawn thin a ni a, BDO/PO atang pawhin cheque hmang vekin 1) SPM, Champhai 2) SPM, Khawbung 3) Branch Manager, MRB Bungzung te hnenah pekchhuah leh thin a ni a, anni hnen atang hian BPM te’n mahni khua ami turte chu lakchhuah ve leh thin tur ani.

                        SPM/BPM te’n pawisa an dawn rual hian Account ah engkim felfai taka ziahluh vek a ngai a, pawisa dawn ruala sem chhuah nghal chum chum mai chu a fel fai lo thei. Tin, Post Office lam te pawh thawktu duhthu sam a tam an awm bik loh avangin bialtu VLAA te’n theih ang anga puih pawh kan tih tur ani.

                        Post Office/Bank atanga Mahatma Gandhi NREGA hlawh sem chhuah kawngah hian VC, BPM leh bialtu VLAA te thawh ho that a tul hle a. Mipui inhlawhna pawisa lakchhuah chungchangah pawh he Office lehkha No. B.11018/5/2005-BDO(KB)/  dated 03.11.2009 hmanga VC, BPM leh VLAA te thawhho theih dan tur ruahmanna siam te pawh kha a theih chin chin ah zawm tur ani. Mahatma Gandhi NREGA pawisa hi a tam tham hle a, mi pakhat chauhin mahni maia hawn mai chi a ni lo. Hlawh la turin VC, BPM leh VLAA te a ruala kal thin nise a tha ber. BPM in SPM atanga inhlawhna pawisa la tura in kalna senso te BDO/PO Office lamin a pe thei lo che u, hei vang hian VC te nen intiam ruala kal a that ber a rinawm. Tin, hmun thenkhat ah BPM in hlawh la tura a kalna senso VC te hnena lo thing mai te pawh kan awm ni a hriat a ni a, hei pawh hi tih tawh loh tur ani.

                        Post Office/Bank kaltlanga hlawh sem hi mipuite tana phurrit siamna tur ni lovin mipuite hamthatna tur zawk a nihzia bialtu VLAA te leh SPM/BPM te’n kan sawi nawn fo thin a tul awm e. Mipuite rilru ah sum khawl duhna (savings) rilru hi he scheme hian hring chhuak thei se a duhawm hle ang. Tin, mipui nawlpuiin Post Office leh Bank dawr dan kalphung te an hriat phah na tur lo ni bawk se a tangkai lehzual ang.

                        Mahatma Gandhi NREGA Operational Guidelines hian Mahatma Gandhi NREGA hna thawh enkawltu (implementing agency) leh hlawh semchhuaktu (payment agency) te thenhran hi a ngai pawimawh hle a. Tun hma kha chuan VC te kha hna thawh enkawltu (implementing agency) leh hlawh semchhuaktu (payment agency) an ni kawp ve ve a, midang hriat loh a a ruka thil lo tih a ti awlsam em em ani. Tunah erawh chuan engkim langtlang taka tih a ni a, implementing agency lamin payment agency te hriatpui lohvin engmah a tihtheih tawh loh a, hei hian check and balance tha tak a rawn hrinchhuah ngei a beiseiawm hle ani.

                        Tun dinhmunah chuan BDO/PO lamin kan hriat theih mang loh Job Card chuang ang te pawh SPM/BPM tan chuan hriat a awlsam hle tawh dawn ani. Vohbik Account thenkhat hlawh rawn la tu tur nei lo i.e Job Card chuang te a lo awm anih chuan khang Account kha chu khawih chet loh a dah mai tur ani. Hetianga kan tih theih phawt chuan Job Card chuang tih ang chi hi chu kan la kalsan thei thuaiin a rinawm ani.

                        Post Office/Bank kaltlanga hlawh sem hi BDO/PO Office lamin mahni ngawta tih mai theih a ni lo. VC, SPM/BPM leh bialtu VLAA te kan thawh ho na a zarah kum 2009-2010 chhung khan Mahatma Gandhi NREGA ni 55 inhlawhna pawisa Rs. 2,44,95,357/- chu Job Card nei chhungkaw 4327 (Post Office Account : 4051 + Bank Account : 271) te tan Post Office/Bank kaltlanga hlawhtling taka sem a ni.

                         Post Office lam hian Core Banking facilities an tih theih loh avngin tun dinhmunah chuan Tih theih a ni tawh lova, chuvangin Bank kaltlangin Mahatma Gandhi NREGA hnuaia mipui hlawh hi Bank kal tlanga pek thin a ni. Khawbung RD block huam chhunga Job Card awm zawng zawng hi Bank account kal tlanga hlawh hi pek vek an ni.

© Khawbung RD Block, Govt of Mizoram

This website belongs to the Khawbung RD Block, Government of Mizoram, India. | Template by ZENICS

Click to start chatting.